Bolludagskaffi.
Bolla, bolla, flengibolla!
Þær voru girnilegar bollurnar sem starfsfólk Sólar gæddi sér á í bollukaffinu á mánudag, sjálfan bolludaginn, sem er mánudagurinn í föstuinngangi 7 vikur fyrir páska. Vatnsdeigsbollur með berjasultu, glassúr og rjóma og ýmsum bragðtegundum.
Hérlendis hefur tíðkast í yfir hundrað ár að borða bollur á bolludaginn. Samkvæmt Sögu daganna er talið að flengingar og bolluát berist til Íslands fyrir dönsk eða norsk áhrif á síðari hluta 19. aldar, líklega að frumkvæði þarlendra bakara sem settust hér að. Enn eru bakararnir að, talið er að íslenskir bakarar baki yfir milljón bollur á ári og eru vinsælastar vatnsdeigsbollur og gerbollur.
Stór hluti starfsmanna Sólar kemur frá Póllandi þar sem einnig er hefð fyrir slíkum degi. Ber þann dag uppá fimmtudag og kallast hann feitur fimmtudagur. Sá dagur er upphaflega trúarhefð sem pólverjar halda hátíðlega með þeim hætti að borða nóg af sætindum áður en langafasta rennur upp. “Paczki” sem við þekkjum sem Berlínarbollur eru vinsælar á þeim degi þar í landi, mjúkar bollur fylltar með rósasultu og sykurgljáa ofaná. Sinn er siðurinn í landi hverju en sannarlega runnu hinar íslensku rjómabollur ljúflega niður hjá öllum starfsmönnum burtséð frá því hvaðan þeir kæmu og voru allir sammála um að rjómabollurnar stæðu fyrir sínu. Að lokum má til gamans geta þess að Pólverjar eiga líka sinn konudag, sem við fögnuðum síðasta sunnudag en hann ber uppá 8.mars þar í landi.
Kíkið á stemninguna, njótið myndanna.
